الرئيسية
الكاتب الساخر كامل نصيرات اقرأوها للآخر وما تحكمو من أولها :
هاتي بوسة يا معذبتني
***
مش بكفّي..لعبنا مع بَعَض لعبة ( دوِّرْ عليّ ) أو ( حراج عليك تمسكني ) ..؟؟ مش أجا دور إنك تقعدي بجنبي ..أو بحضني ..نفسي أبوسك ..!! نفسي أمسكك وأمرِّغ شفايفي كلهن فيك ..!!
آآآآآآآآآآآخ شو نفسي ؛ أمشي أنا ويّاك في السوق ..إيدي بإيدك ؛ وقدّام العالم كلها ..أصرخ زي صرخة عبد الحليم لشادية لطفي في فيلم ( أبي فوق الشتلة ) : حبيبتي ..إنت حبيبتي ..يا عالم يا ناس ؛ شايفين هاي ..هاي حبيبتي أنا ..!! وتصيري تركضي وأنا أركض وراك..وآخر شي أمسك ..وآآآآآآآآه عليّ لما أمسكك ..شو رح أعمل ..؟؟ رح ( آكلك أكل ) ..نفسي من زمان آكلك ..بس آكلك على طريقتي أنا ..آكلك وأنا شاعر إنك إلي لحالي ..مش كل الناس بدهم ياكلوك زيي ..!! أنا ما بحب حدا يشاركني فيك ولو بالنظرات ..فهمت ..لازم تكوني لي لحالي ..!!
الناس كلها بتحكي عنك وعن طلعتك كثير في الشارع ..وبيحكوا إنك بلسان الناس علكة ..أكون صريح أكثر ( إنت سيرتك على كل لسان ) ..والله الكل بيحكي عنك ..وحكي مش كويس ..بيحكوا إنك شايفة حالك عليهم ..وإنك رخيصة ..وإنك ما إلك صاحب ..وإنك تروحي مع أي واحد يمسك طرفك ..ومع ذلك ؛ صرتِ هسّة في العلالي وما بتقعدي إلاّ على طاولة ..وبطلتِ تقعدي ع الأرض أو تنبطحي عليها..!! وبقولوا إنك صرتِ تلبسي نظارات ضد الشمس ..طيب أنا عمري قعدتك بالشمس ..مش دايماً كنت أحطك في الظلّة وما أخلي حدا يقرِّب عليك ..يا حراااااااااااامك من الله ..فسدت أخلاقك ..وصرت تمشي المشي البطّال ..!!
ومع ذلك ..يا حبيبتي ..ومعذبتي بين الأمم والشعوب ..يا إمشمتة القرايب و الحبايب فيّ ..ومع إنك أمنية يتمناها كل واحد ..فأنا الوحيد إللي بحبك بصدق ..وعلى استعداد أقعد أبوس فيك من هسة للصبح بدون ما أقرّب عليك ..لأني متيّم حقيقي فيك ؛ مش واحد من الطنطات إللي علاقته معك بتكون دايما عَ الماشي ..!! و أنت تعلمين كم أحبك ..وتعلمين أكثر إنني تبهدلت آلاف المرات بسببك ..وإنني على استعداد إذا ابتعدتِ عني أن أعمل ثورة وأكسِّر الدنيا ..وأخلّي إللي ما يشتري يتفرج ..!!
من قصيرها ..إذا ما رجعتِ إليّ و أعطتيني بوسة من إللي يحبهن قلبك ..وقلتيلي نفسي أعيش معك بقية حياتي ..وحياة شرف إللي ماتوا وهُمّه يتفاوضوا على سعر الزنا إلاّ أخلّك تندمي على اليوم إللي دخلتِ فيه الفُرن ..و ما أخلّي إللي يشوفك يعرف إنك ( لقمة الخبز أو لقمة العيش )..!!
والآن عزيزي القارئ ؛ بعد أن عرفت أن التي أحكي عنها هي لقمة الخبز وليست ( كما ذهب ذهنك ) أرجوك اقرأ المقال من جديد واستمتع به ..!!
» اداة ذكاء اصطناعي للباحثين وطلاب الدراسات العليا
» وفاة 30/7/2013 : جمال ابراهيم علي الحروب
» جميع حلقات سيف النار
» اسماء المرشحين في انتخابات بلدية خاراس القادمة!!!!!؟؟؟؟
» د.ناصر اللحام رئيس تحرير وكاله معا يصف خاراس
» تهنئة العضو القدير khamdan بالخطوبة
» مشكلة المياه في البلدة والقرى المجاوره
» شات عربي
» صور من خيمة التضامن مع الاسير ثائر حلاحلة في خاراس