حوار في ( مقبرة حمصية ) .. !! ..

غادر ( أبو شام ) ومجموعته من حفاري القبور ومساعديهم وبعد أن غادرت دورية الشرطة – بالمناسبة الدورية موجودة بعد الحادثة التي قام بها أبناء عائلة معروفة بنبش قبر أبيهم بعد ساعات من دفنه لوضع بصمته على بعض الأوراق من أجل حرمان أخواتهم الإناث من الميراث –

وما إن قاربت الساعة التاسعة ليلا حتى وقف أحد الأموات راغبا بالتجوال بين القبور وسماع أخبار الأموات الجدد :

* السلام عليكم

+ وعليكم السلام

* مكتوب على القبر ( فرحان ) ؟؟

+ خير ؟؟؟ وإذا بتسمح خليك واقف لا تقعد على طرف القبر بتوسخ الرخام

* ليش حضرتك شو كنت تشتغل ؟؟

+ مسئول بشركة الكهرباء

* هههههههه حبيبي بالدنيا كنت مسئول هلأ متلك متلي تحت التراب وشويعني إذا قبرك رخام وقبري حجر ولا مفكر الملائكة بيحاسبوا بس اللي قبورهم حجار ؟؟؟

+ أنا بالدنيا كنت عامل جنة ونار بدون توقيعي ما بتركب ساعة كهرباء وبدون ابتسامتي بيبقى الشارع عتمة وبدون بدون وبدون شو بدي احكيلك لإحكي ..

* وعملت مصاري كتير من شغلك ؟؟

+ الشوارع اللي نوَرتها مشان ناس أصحابي مقابل كل شارع كانوا عم ينوَرولي مستقبل ولد من الأولاد وعلى كل ساعة كهرباء هدية وإذا كانت محولة وتري فاز بتتقل القصة ، وإذا إعفاء من شي مصيبة بتوصل القصة لسيارة هدية .

* ما خايف من يوم الحساب ؟؟

+ غشيم !! أنت واحد غشيم ولك أنا سرقت لما كنت موظف أموال ما بتاكلها النيران وأولادي هلأ عم يتصدقوا على روحي حبيبي أنا فرفور وذنبي مغفور ما بحاسبني حدا

* أنا غشيم خليتني اضحك مع انو احتراما لحرمة الأموات ما بصير الضحك بس انشاء الله مفكر ولادك رح يفطنوا

فيك ؟؟؟؟ ولك بيكونوا قالوا الله لا يردو مالك خبر شو بيقول المتل ( مال الخسيس بيروح فطيس ) وبكرة شوف ولادك ما بيصرفوهم غير على الدكاترة وعلى الحرام

* أول شي عم تقول احتراما للأموات ليش ما عم تشوف شو عم يصير بالنهار اي صارت المقبرة متل الكافتيريا وبعدين يا سيدي بالنسبة لأولادي مو مشكلة المهم يتهنوا فيهم على كل الأحوال أنا معي شهادات يوم الحساب بتخفف عني وبدخل الجنة حبيبي الدنيا مليانة من أشكالي

+ الله كريم رح شوف غيرك

.......................

= السلام عليكم

- وعليكم السلام يا ابني

= حجة والله ما بتقومي ... مكتوب على القبر ( عربية) ؟

- مظبوط يا ابني هدا اسمي

= حجة ممكن تخففي الكهرباء !! الضَو عندك قوي كتير ؟؟

- يا ابني هي مو كهربا هادا الضَو من عند الله

= شو كنتي تشتغلي يا حجة

- أنا يا ابني كنت اشتغل بتنظيف البيوت وكنت متجوزة رجال أبوه وأمه مقعدين وضليت كل حياتي ربيت أولادي وأخدم عمي وحماتي لحتى الله أخد أمانتو

= غريب يا حجة ليش ما في دار للعجزة ولا ناقصكن مصاريف ؟؟؟

- الله يسامحك يا ابني اللي بدو يعيش بدار الآخرة مبسوط ما بيبعت عمو وحماتو على العجزة الرزقة مقسومة فيهم وبلاهم الحمدلله إنهم ماتوا وهني عم يدعولي

= الله يهنيكي يا حجة عن إذنك رح سلم على اللي اجو اليوم

.....................................

+ السلام عليكم

* وعليكم السلام

+ شو القصة قبرك لسه تراب ما فيه لا حجر ولا رخام بس آس وأكاليل ورد

* أنا ميت جديد (شغل اليوم )

+ ممكن نتعرف

*( سميح ) ؟؟؟

+ تشرفنا ، شو كنت تشتغل ؟؟

* كلشي

+ متل شو ؟؟

* أخي أنا نصير الفقراء والمحتاجين والمتذمرين وين في فقير ومحتاج بجي لعندو بعدين بخرب بيتو وبلعن أبوه

+ كيف يعني ؟؟

* بدَور على هالناس اللي بدها تتوظف باخد منها مصاري وعالوعد يا كمون ، وين في فقير عندو معاملة ما عم تمشي باخد منو المعلوم وبهرب وعلى الوعد يا كمون ، بموسم المازوت بيع قسائم الفقرا ، بيع أدوية للمريضين بالسرطان المهم عيش

+ ليش حضرتك صيدلي ؟؟ وليش ما كنت تروح على الأغنيا ؟؟؟

* لأ بس عندي واحد تابع للصحة بيجيب الأدوية على أسماء مرضى وهميين مجانا ونحنا بنبيعهم للناس ، بعدين الغني بيحسبها أما الفقير فمتل الغريق بدو يتعلق بقشة

+ بس عم تقول مجانية ؟؟!!!

* يا عمي مجانية صح بس بيقولولهم مافي دوا بيضطروا المرضى يشتروه من السوق السودا

+ وأنت السوق السودا ؟؟؟

* أنا السودا والبيضا وكل الألوان أنا بعجبك

+ جمعت مصاري كتير ؟؟؟

* من ورا أدوية السرطان اشتريت صيدليتين واستأجرت شهادات صيادلة والحالة مستورة لوقت الله أخد أمانتو

+ معناها الدنيا تغيَرت ما كان هيك على دوري ؟؟؟

* أخي ما في شي تغير بس انتو اللي من قبل ما كنتوا تعرفوا تحسبوها

+ وأنت حسبتها صح ؟؟

* طبعااااااااااااا

+ وحسبت الآخرة صح ؟؟

* طبعااااااااااااااااا

+ ويوم الحساب شو رح تقول لربك ؟؟ أديه مرضى رح يستَنوك ؟؟

* أخي لا تستعجل أنا اليوم وصلت من هلأ لوقتها فرج

+ السلام عليكم رح شوف غيرك

...........................

" السلام عليكم

* هاي

" شو ((هاي )) ؟؟ مين حضرتك ؟؟

* أنا (هيفا) اسمي ( قادرية) على اسم ستي الله لا يسامحو أبي على هالإسم سماني على اسم أمو

" شو بتشتغلي يا هيفا ؟؟ وليش ما عندك كهربا شو لسه ما وصلولك الساعة ؟؟

* لأ لسه مع إني مقدمة على ساعة تري فاز مشان المكيفات بس عم يقولوا عالدور !!!

" غريب !! اللي متلك ما بوقف عالدور بفوت طحبشة

* بالدنيا كنت هيك مافي شي ينسد بوجهي بس هون كلشي عم يجي بالعكس أف يا !!!! والله ملليت

" طولي بالك شو كنتي تشتغلي بالدنيا ؟؟

* بابا شوفير سرفيس وماما بالبيت ما بتشتغل

" أنا سألتك إنتي مو أهلك ؟؟

* أنا لمَا صرت صبية ما كانت تعجبني عيشتنا ولا يعجبني بالبيت حدا قمت عشت متل ما بدي وكان يجيني مصاري باليوم أكتر من اللي بيطالعوا البابا بشهر- بابا كان قليل حيلة - بتعرف صار عندي موبايل وكانوا رفقاتي يدفعولي الفاتورة مهما كانت كبيرة ويشترولي تياب وكلشي بحبو

" رفقاتك شباب ولا بنات ؟؟

* أف شبك أنت ؟؟؟ يا الله شو غليظ !!!! شو طق عقلك ؟؟ طبعا شباب بدها تفكير يعني ؟؟

" لا تأخذيني يا بنتي على دورنا ما كان في موبايلات ولا هالقصص !! وشو صار بعدين ؟؟

* عمو الدنيا صار مليانة هيفا ، بقيت عايشة هيك ليوم بابا كان عندو توصيلة عطرطوس قام شافني بتياب مزلطة مع أربع شباب وكنا عم نرقص عالبحر - قلتلك بابا متخلف وقليل حيلة - صار بدو يعمل رجال وجريمة شرف قام قتلني واجيت لهون

" وشو صار بأبوكي ؟؟

* ما صارلو شي بسبع رواح بس صار معو شلل نصفي

" مبسوطة هون ؟؟

* لسه ما شفت الناس ما بعرف خيرها من شرها هالعيشة بس عم يطلعلي على طول ثعابين وعقارب وشغلات بتخوف

" الله كريم لسه ما شفتي شي لنشوف غيرك

..................................

+ السلام عليكم

= وعليكم السلام عمو

+ شو اسمك ؟؟

= شهيد

+ ايمتى اجيت يا عمو ؟؟؟

= أنا اجيت من شهر كنت رايح على مدرستي لمَا ضربتني سيارة ، هرب اللي ضربني وبعدين أخدوني الناس للمستشفى بس ما لحقوني لإنو طبيب الاسعاف كان نايم وما بحب حدا يفيقوا الصبح واجيت بعدها لهون

+ ما عرفوا اللي ضربك ؟؟؟

= عمو عرفوه بس البابا خاف يشتكي

+ ليش ؟؟؟

= اللي ضربني ابن ( شخصية ) كانت معو بنت بالسيارة ، بعدها قالوا انو الشوفير ضربني بس بابا بيخاف الله ما حب يفوت الشوفير على الحبس ظلم قام ما اشتكى

+ شو بيشتغل أبوك عمو ؟؟

= آذن بالمدرسة يعني مستخدم

+ شو عندك أخوة ؟؟

= أنا وحيد عندي أربع بنات خوات

+ إنشاء الله مبسوط هون عمو ؟؟

= الحمدلله كل يوم بنطير أنا والطيور ما بنرجع إلا بالليل وبعدين بنام

+ السلام عليكم يا عمو لنشوف غيرك

................

* السلام عليكم يا أخ

+ وعليكم السلام خير شو عم يوجعك ؟؟

* ولا شي !! ليش حضرتك مين ؟؟ وشو بتشتغل ؟؟

+ أنا ( سمير ) دكتور ومدير مشفى حكومي سابقاً

* أهلين دكتور

+ عفوا ما بصافح حدا يمكن ايديك فيهم جراثيم

* لا تأخذني دكتور حضرتك من زمان هون ؟؟

+ لأ من شهر بس

* شو أخبار الدنيا برا ؟؟

+ هههههههه الدنيا بخير الفقير عم يموت موت بطيء والوسط عم يجيه يا فالج يا شلل نصفي يا عم يموت بالسرطان من كتر شرب الأدوية والتلوث والغني عم يزيدوا مصاريه كل يوم بطرق متعددة

* ليش الفقير عم يموت ؟؟ كانت الدنيا فيها رحمة والفقير عايش

+ ههههههه الله يوفقك ما بحب اسمع نكت كتير ، الفقير يا عمي كان أول شبعان ومكتفي بس ما قادر يرفه عن نفسو هلأ ما عم يقدر يلاقي أكل ليشبع بتعرف في ناس من الفقر باعوا أعضاء من جسمهن ، وأما الوسط فصار يتشقف ويتنتف يوم بعيش متل الفقير ويوم عم يعلَق حالوا بسيارة الغني بتشحطو شوي وبعدين بينقطع الحبل وبينزل بوادي الفقر عن جديد ، والغني معمي على قلبو ما بيشوف غير الأغنيا متلو ، بيصرف مصاريه على الأغنيا وبينسى إنو في ناس بتنام ما معها حق العشا وولادها ميتة من البرد .

* إنشاء الله كنت مبسوط بوظيفتك ؟؟

+ طبعا ، أهلي وأهل مرتي وكل رفقاتي كانوا يتعالجوا بأحسن المواصفات ومجانا ، حتى من كتر الخير كنا نعطيهم الأدوية مجانا ، ههههههه

* يعني الدولة مو مقصرة مع المرضى بالطب والأدوية ؟؟

+ لا أبدا الدولة بتعطيهم مجانا العلاج والأدوية بس بتعرف يا ابني أنا مدير معقول أبخل على أهلي ورفقاتي وأعطي عامة الناس

* بنك الدم كان تابع لإلك ؟؟

+ لا أنا اختصاصي مص الدم مو سحب الدم

* كيف يعني ؟

+ يا ابني المنصب فرصة وبيجيك مرة بهالعمر يا بتستخدموا بشرف وبينشف دمك وبتموت انت وشرفك الوظيفي وبيقولوا عنك غشيم ، يا أمَا بتعمل دورة مص دماء وبتبلش تمص من دم البشر المفروض لتعيش إنك تلعن أبو الفقير ولازم من مصَه وحدة تكون نشفتلو دمو وتموَتو ، يا ابني كان عندي دكاترة بالمستشفى بياكلوا سندويشة فلافل وبيشربو كولا والمريض عم ينازع بين أيديهم ، وعندي دكاترة بيدخنوا سيجارات بالعناية المشددة ، بتعرف مرة في دكتور ترك المريض مفتوحة بطنو وقعد يغازل صاحبتو عالتلفون نص ساعة لحتى صار الوضع كتير متأزم وصار اللي صار ، أنا كنت مديرهم شو بدي صلَح المجتمع ، المهم رصيد البنك عم يكبر وأمَنت بيوت وسيارات للأولاد وماشي الحال

* مبسوط هون ؟؟

+ ماشي الحال بس كإنوا ما في سيجار هون ؟؟ وبعدين الناس هون مو كلاس يعني ما في حدا مستاهل أخد وأعطي معو ؟؟

* لا تأخذنا يا دكتور هون ما بيوصل الواحد وفيه نقط دم عم تمشي ، هواية مص الدماء معدومة بس لا تخاف من جهة الأخد والعطا بكرة يوم الحساب كل هالبشر اللي شفتهم بالدنيا رح تاخد وتعطي معهن بالآخرة بس بدون لا مص دم ولا هم يحزنون